MANIFIESTO NA DEFENSA DA SANIDADE PÚBLICA

A Sanidade Pública universal e de calidade foi a base fundamental para o desenvolvemento do Estado do Benestar e é un dos alicerces para asegurar a solidariedade e a equidade dentro dunha sociedade, pois supón o esforzo das persoas con máis poder económico e máis sans para permitir a atención sanitaria dos que teñen menos e están enfermos.

Nos últimos anos hai unha campaña xeneralizada para desprestixiar e desmantelar os sistemas públicos de saúde, coincidindo co auxe do neoliberalismo, que quere privatizar os sistemas sanitarios públicos e que busca neles unha oportunidade de negocio.Esta tendencia internacional cara ao desmantelamento dos sistemas sanitarios públicos afecta a todos os países en maior ou menor medida. No estado español obsérvanse intentos por avanzar na privatización dun sistema sanitario que goza de gran aprecio internacional, precisamente pola súa universalidade, boa accesibilidade e carácter equitativo.Con todo, a privatización non se realiza do mesmo xeito en todas as CCAA, porque depende, en gran medida, tanto da vontade política dos gobernos autonómicos como da capacidade dos cidadáns e das forzas sociais para evitalo. Son as CCAA gobernadas polo PP onde se produciron ataques máis serios contra a Sanidade Pública, como sucede en Madrid ou Valencia, por citar só as máis significativas.

Nesta campaña privatizadora xoga un papel fundamental a estratexia de convencer á opinión pública das ineficiencias e problemas de funcionamento do sistema sanitario público, cando son os neoconservadores e neoliberais os principais responsables desta situación mediante a introdución de novas formas de xestión empresarial, que coa desculpa de innovar, o que en realidade buscan é pór por diante o aforro, esquecendo a calidade da atención sanitaria.Ademais, a introdución de formulas de xestión empresarial facilita a privatización dos centros, mantendo o financiamento con diñeiro público e esquecendo que estas novas formas de xestión son modelos xa ensaiados no Reino Unido, onde conseguiron encarecer a construción e posta en marcha dos novos hospitais catro ou cinco veces máis que os do modelo tradicional. O funcionamento dos mesmos, con dúas empresas distintas coexistiendo no mesmo centro, e o aumento dos gastos administrativos que supón o incremento da burocracia, amosou deficiencias importantes en canto ao coidado da saúde dos pacientes e un encarecemento dos custes e problemas coa xestión, tal e como sinalou a Organización Mundial da Saúde. Os grandes perdedores destes cambios que se aveciñan serán os cidadáns, porque a calidade dos servizos sanitarios empeorará, e porque os modelos privatizados teñen uns custes moi superiores. Os cidadáns veranse na obriga de pagar para poder utilizar os centros asistenciais e, ao cabo, unha parte da poboación, a máis pobre e a máis enferma, verase excluída dos sistemas sanitarios.

Lembremos o exemplo dos USA, onde 47 millóns de persoas non teñen dereito a ningunha atención sanitaria a pesar de ser o país do mundo que ten un maior gasto sanitario.A falta de interese político pola Sanidade Pública concrétase na masificación e nas listas de espera para intervencións cirúrxicas, para as consultas dos especialistas, as probas diagnósticas e, mais recentemente, para os médicos xerais e pediatras. Todo iso desde unha política de premeditado descrédito da Sanidade Pública, pois está claro que este é o primeiro paso para acadar un apoio cidadán á súa privatización.

E trátase só dos primeiros pasos, posto que hai unha estratexia de avanzar de xeito lento e continuado ata conseguir que o dereito á protección da saúde deixe de ser un dereito de todos os cidadáns e pase a ser un privilexio para aqueles que poidan pagala, deixando para os demais un modelo similar á antiga beneficiencia.Aínda estamos a tempo de salvar un Sistema Sanitario que esta valorado entre os mellores do mundo, pola calidade dos seus servizos e sobre todo polo seu carácter universal, gratuíto e solidario. Por iso facemos un chamamento a todos os cidadáns e profesionais da saúde a mobilizarnos no seu defensa. Non podemos permitir que a Sanidade Pública convértase nun negocio no que uns poucos benefíciense á conta da saúde de todos.